Gollandiyede «mehmud kashgheriy ilmiy muhakime yighini» ötküzüldi

Toluq Teksti



Gollandiyede
«mehmud kashgheriy ilmiy muhakime yighini»
ötküzüldi


Birleshken döletler teshkilati pen - ma'arip komitéti 2008 - yilini mehmud kashgheriyni xatirlesh yili élan qilghandin kéyin dunyaning herqaysi jaylirida bolupmu türkiye we ottura asiya türkiy jumhuriyetliride nurghun pa'aliyetler élip bérildi.

2009 - yili kirgendin kéyinmu mehmud kashgheriy heqqidiki pa'aliyetler dawam qilmaqta.
2009 - yili 1 - ayning 25 - küni gollandiyining amstérdam shehiridiki anatoliye wexpining yighin zalida «mehmud kashgheriy ilmiy muhakime yighini» ötküzülgen.

Bu yighinni gollandiyede pa'aliyet ötküzüwatqan türk tetqiqat merkizi, yawrupa türk démokratlar birliki, gollandiye türk yazghuchilar jem'iyiti, ezerbeyjan medeniyet jem'iyiti we iraq türkmenliri insan heqliri wexpi qatarliq sekkiz ammiwiy teshkilat ortaqliship uyushturghan bolup, bu yighin'gha yawropada yashawatqan qérindash türkiy milletlerdin köp sanda kishiler qatnashqan.

Bu yighinda türkiyidin alahide teklip bilen qatnashqan türkiye re'is jumhuri bash katipi prof. Dr. Mustafa isen, türkiye til tetqiqat idarisi bashliqi prof. Dr. Shükri aqalin, türkiye jumhuriyitining gollandiyediki bash elchisi selahettin alpar qatarliq kishiler qatnashqan we söz qilghan.
Ular yighinda qilghan sözide, ulugh alim mehmud kashgheriy we uning esiri «türkiy tillar diwani»ni yawropada yashawatqan yash nesillerge ögitishning ehmiyiti üstide toxtalghan.

Türkiye jumhuriyiti dölitining mehmud kashgheriy we uning esiri «türkiy tillar diwani»ni yash nesillerge ögitish we bu heqte tetqiqat élip bérishqa alahide ehmiyet bériwatqanliqini tekitligen bash elchi, pütün dunyadiki türkiy milletlerningmu bu ortaq qimmetke ehmiyet bérishi kéreklikini tekitligen.

Yighin'gha alahide teklip boyiche türkiyidin qatnashqan türkiye til tetqiqat idarisi bashliqi shukri aqalin mehmud kashgheriyning kimliki, hayati we yézip qaldurghan eng ulugh esiri «türkiy tillar diwani» heqqide melumat bergen.
U sözide yene, mehmud kashgheriydek tughulghanliqining 1000 - yili tebriklinip kéliwatqan ulugh insanlarning dunyada bekla az ikenlikini tekitligen.


http://bbs.xabnam.com/read.php?tid-93458.html
**************************